إمتحـانات .. مـلل .. تعـالوا هني !

[قهوهـ]

السلام عليكم :wep:

شحـوالكم ؟ إن شاء الله زينين !؟

طبعاً معظمنا حـاليا ً يمر بفترة ( إمتحـانات ) !

وطبعاً الفترة هذي .. من أسوء الفترات .. :-[
وكل طالب / طالبة .. يكون متملل .. وضايق خلقه .. وحالته حالة !

وكل واحد يقول ( أوهوو مادري جيفه براجع .. ملل .. أوف ) .. ويهد الكتاب ويقوم يتمشى في البيت ويتهاوش ويا فلان وعلان .. أو يشغل التلفزيون ويطالع نور وسنوات الضياع :tongueii: .. أو كعادة الصبيان يهيمون في الطريق .. من باب الترويح عن النفس .. وفي فئة من الناس تبطل الثلاجة .. وتقعد تبلع .. عشان يروح الملل .. ووو ... :weo:

في هذا الموضوع بنقدم نصائح صغنونة حق الناسات هاذلين ..

أول شي .. قبل المراجعة :wep:

- لازم الواحد يعرف هو ويش بيراجع .. وويش لازم يراجع ..
يعني من الأفضل الواحد يسوي ليه جدول .. لـكل مادة ..
يعني مفـلاً .. باجر عليي إمتحان دين .. أو اي شي .. وهذا الكتاب في أطعشر درس ..
فأروح اسوي جدول اقسم فيه الدروس على هيئة فترات .. وبين كل فترة وفترة .. أخلي راحة ربع ساعة .. نص ساعة .. مو أزيد .. :weo:

- فاني شي .. لازم أختار محل حليو .. عشان اراجع فيه .. :11ughboun
يعني اختار مكان مرتب .. مو حالته حالة .. الفياب منفرة .. والكتب مفلتة .. والحالة قايمة .. لازم ارتب المكان .. عشان تنفتح نفسيتي حق المراجعة .. واشغل الايسي واسوي المكان بارد ..
واجهز ليي مكان اقعد فيه .. واجهز كل اغراضي عشان ما اتحجج كل شوي واقوم اجيب قلم أو براية أو ورقة .. عشان يضيع الوقت :tongueii:

- طبعاً الواحد لين يراجع لازم يجوع له .. واهم شي البطن .. فلازم اجهز ليي كلاص عصير .. وشوي بستووك .. عشان اراجع وآكل .. :hui: ..
بس لازم يعني بحدود المعقول .. مو اروح اجيب البرادة كامل .. والله احط ليي صحن مجبوس دجاج .. والله سمج مقلي .. يعني شي خفيف ..

- اهم شي اسوي قبل المراجعة .. اني لازم اقنع نفسي اني براجع وبحفظ والمادة الي براجعها سهلة حدهـا .. واقعد اقول لنفسي ( اي سهـل .. بخلص بسرعة .. باجر بسوي زين بعد ) .. عشان فعلاً هذي الجملة تتعلق فالمخ .. وهذا الشي ينعكس على النفسية وتصير تمام التمام ..

- آخر شي .. انا الحين دشيت براجع خلاص .. لازم اقعد ليي قعدة عدلة .. يعني مو اتسدح واتبطح .. وبس جم دقيقة اشوف روحي نايم . :$


ثاني شي .. حزة المراجعة :wem:

- أول شي .. لازم أقرا الدرس كامل أول .. واحط على كل فقرة عنوان كبير .. واحدد نقاط الحفظ .. وبعدين اقرا الدرس شوي شوي .. وافهم كل كلمة .. ولين وصلت لنقطة الحفظ احفظها .. :weo:

- زين الحين حفظت له .. شلون تعرف انك حفظت .. لازم تسمع لروحك !؟ :wer:
زين جيفه اسمع لروحي ؟ يعني اشيل عيوني شوي عن الكتاب واقعد اقول النقاط بعدين اطالع الكتاب اشوف صح لو لا ؟ :wep:
او انك تاخذ ورقة وتكتب فيها النقاط .. عقب تصحح لروحك :whi1:

- عقب ما اخلص الدرس لازم احل اسئلة عليه عشان أتأكد أني حفظت زين وفهمت عدل .. :wep:

- طبعاً لازم حزة المراجعة تتملل من القعدة .. أو المكان .. فهني الخبراء ينصحونك بتغيير القعدة أو تغيير المكان .. لان اذا انت مو مرتاح ما بتعرف تراجع . :eww:

- طبعاً لين سويت الجدول .. لازم امشي عليه مو أراجع كم درس واقول يالله بريك الحين .. وبعدين يحلى ليي الوضع واسمتها .. :wet:
لازم يصير عندي اصرار وعزيمة .. عشان أكمل .. والتزم ..


فالف شي .. عقب ما اخلص مراجعة :11ughboun

- طبعاً عقب ما اخلص مراجعة .. يحس الواحد .. كأنه جبل وأنشال من على راسه .. لكن يبقى القلب يدق ويدق ويدق .. وتبتدي المحاتاة تزيد .. هني لازم الواحد يسلم أمره لربه ويتوكل على الله . لان هو سوا الي عليه والباقي على الله .. :wem:
وعلى الواحد أن يقرا ادعية وآيات تخفف عليه .. مفل آية الكرسي ..

- طبعاً .. نتعشى عدل .. وننام .. بدون ما نفكر في الإمتحان .. ولازم نجهز أغراضنا من الليل .. ونتأكد من الفترة .. مو نحسب الامتحان الفترة الفالفة ويطلع الاولى .. وتالي عاد تعال دور واسطة عشان يعطونك عذر .. او شلخ على الدكاترة :weo:

- ما انسى بطاقتي .. لازم ابرزها .. أو الصقها في ثيابي .. لان هذي البطاقة .. اذا نسيتها يأخرونك عن الإمتحان .. ويسوون تحقيق .. ويقولون لك جيب بيزات .. وتتوتر .. والناس تحل الامتحان .. وانت للحين في سالفة البطاقة :rew:

- يوم الأمتحان .. لازم لازم .. اخصص وقت اعيد على الي درسته كامل .. عشان اتأكد اني حافظ كل شي .. :wep:

- قبل لا أروح الامتحان .. يفضل اني اقرأ كم دعاء .. أو شوي قرآن .. ويفضل كثيراً قراءة زيارة عاشوراء .. عشان الله يوفقني .. :weo:

- لين وصلت .. اللجنة .. اقعد وما افتح الكتاب ولاشي .. وما اقعد اتسأل في الأوادم حزة الحزة .. استرخي .. واحارس الاوراق :whi1:

- وزعوا الأوراق وحانت اللحظة الحاسمة .. أول شي أكتب اسمي .. وأقراً سورة من القرآن وما اتوتر .. عقب ابطل الصفحات وافرفر .. ومو لين شفت سؤال ما عرفته تعتفس وتنتفض و تصير حالتك حالة .. لا عادي .. لين وصلت للسؤال يصير خير .. واذا ما عرفته طوفه وكمل الامتحان .. عقب ارجع ليه وفكر على هداوة .. :weo:

- طبعاً لازم يصير ( الاستعانة بصديق ) .. :wes:
يعني اذا شفت المراقب شديد .. ماليه داعي اسوي لي سوالف واقعد افر راسي مني مناك .. يمكن احصل احد آخذ من عنده الإجابة .. اتوكل على الله واكتب الي عندي ويمكن يصير صح .. احسن من اسوي ليي سالفة له ؟ :wet:

- من أخلص الإمتحان .. لازم اعيد عليه .. واتاكد اني كتبت كل شي .. وما نسيت شي .. وعقب اقدر اسلم الورقة واطلع :11ughboun


---

طبعاً هذي نصايح صغنونة ..
أتمنى يتسفيدون منها الناس كلهم ..
وبالتــوفيق للجيمع .. :wef:


قهـوهـ

[لـَحَنْ]

ياعلي يا علي يبو حسين ،،

ذكرتيني بـ حالتنا في الصف ،،

الآنسة انتين صوبي ،، والتحرطم يزيد :wek:

يا علي ، ما بتصيرين وياي في لجان :hun:

/ روعة النصايح قهوتي ، كل يوم تعالي :1: /

> ذكرتيني بالبطاقة بعد :1:

موفقة :wem: ..

[**فدك**]

:1:اني ولا شي من الا قلتينه اسويه


لو يخلوني في محل هدووء ،، مستحيل مستحيل مستحيل احفظ كلمه وحده

لكن خليني في مكان فوضى ,, احفظ كلشي لا وبسرعه :rui1:

ادا خواتي الصغار نايمين اشغل اي شي يسوي ازعاج :hun: بس عشان احفظ


لين جيت ادرس ،، لازم قدامي دفتر خاص بالمراجعه ،،

اقرا واكرر 3 اربع مرات لين ما اتاكد اني حفظته بعدين اكتبه باختصار في دفتر المراجعه ،، هاده يفيدني ليوم الامتحان لاني سجلت المعلومات المهمه وشرحها ،، ومايحتاج افتح لكتاب لاني عبارتن سويت لروحي ملخص اني فاهمتنه

لازم ايام الامتحانات اكثر من الكاكو :weo: والله مخي مايشتغل :weo:

عقب ماكمل كااااامل افتر على خواتي اتعلف بهم :uio: عبارتن مستانسه ،،

طبعا ما انام الليل :wer: مايجيني نوم لو ويش اسوي في عمري مانام ,, لو عساه امتحاني فتره 3 بعد ماانام ,,

اظل فالمسن ويا الربع لانه حالهم من حالي ماننام ،، نسولف شوي وبعدين نتلاقى فالمدرسه ،،

نقسم على بعض لدروس وكل وحده تشرح للباقي ،، ونتناقش وجى ..

لين بدى الامتحان اصكك كلشي ولا افتح شي ولين سالوني كله اجابتي مادري مادري :weo: اخاف يخربطوني لانه :weo:..

ادا استلمت الورقه ،، البسلمه ،، اقرا دعاء الحجه لازم لازم لازم لاااااااااااازم وادا نسيت اقراه وتدكرت مباشره اقراه لانه يريحني ويخليني اعرف اجاوب .. في دا دعاء رب اشرح لي صدري الــخ ،، بعد اقوله ،، اصلي على النبي واكتب البيانات وافتح ورقه الاسئله ،،

اطلع من الامتحان واني مرتاااحه كلياا :eww: وضامنه كلشي اوكي


اروح البيت اناااااااااااااااااااااااااااام وانااااااااااااااام وانااااااااااام وماقعد الا متى

وبعدين فالشهاده انصدم انه جايبه اقل من الا متوقعتنه :wei: كله بسبب اغلاط تافهه :wei:

وبس :tongueii:

[Just Smile]

بتخرج من الجامعة واني للحين ما اعرف ادرس :wek:

[وهج البرق]

شكراً على هذه النصائح معني لااعمل بها ههههههههههههههه
يعني لازم اتهاوش او العب بليستيشن و كورة اتحجج بأختي لأن ما اطيق سنوات الضياع:-[
بس يعني اقرا مرتين والباقي على الله لكن اجيب في التسعين وآخد التفوق ما ادري كيف
















انا ما اغش بس اغشش:eww::whi1:

[قهوهـ]

لـَحَنْ

شكـراً كفيــراً على تشـريفش هُنـا ..
والله يوفقنـا ويوفقش .. إن شاء الله ..
وتعدي هالسنـة على خيــر .. :wem:
وإن شاء الله ما صرتين ويايي في لجنة الحين ..
نصير ويا بعض فـ الجامعة .. :weo:

**فدك**
مادري شـلون تعرفون تراجعون مكان فوضى .. ؟
أني لين أحـد ويايي يتنفس بس .. ما اعرف اراجع ..
ولا اعرف احفظ شي ..
وطبـعاً عقب ما نخلص مراجعة لازم ..
نسوي اشياء نعبر عن فرحتنـا .. :tongueii:
بس يبقى المخ مشغـول بالإمتحـان ..
شـكراً فـدك ..
Just Smile

الله يسـاعدش يا بتي .. :wem:
وتتخرجين وتشتغلين .. وتنسين المراجعة وبلاويها .. :eww:
حياش الله نورتينــا ..

وهج البرق

اي أكيد بجيبون في التسعين ..
صبيـان له .. كل شي بالتلويص ..
لو كاتب نص كلمة صح .. من الأجـابة النموذجية حطوا درجة كاملة ..
واحنا فلافة ارباع الأجابة مفلها .. ويحسبون لينا غلط :wes:
وبعدين حقوي تتحجج بـاختك ؟
خلهـا تطالع سنوات الضياع ويش صار !؟ لازم انت تحبها :wer:
ع العموم .. حيـاك الله .. ومشكور ع المرور .. :wem:

[عاشقة البنفسج]

شكرا عومري:hun:

i need it

( اي سهـل .. بخلص بسرعة .. باجر بسوي زين بعد )
اذا اقول هالجمله استهتر ولا ادرس
واذا ما اقولها اتم اتراجف ماعرف ادرس

:weeping:خير الامور اوسطهآ
عاد مادري ويش الوسط:hun:

[H.AlMaDhOoN]

بتخرج من الجامعة واني للحين ما اعرف ادرس :wek:


:wej:

ده يعني مو بس أنا

[عاشقة البنفسج]

ده عفر


حصلت ناس نفسي:wei: